خذ وخل لرشيد الحوطي

( قصه باللغه الحوطيه الفصحى )


سلام 

كان ياما كان في سالف العصر والمغرب والأوان يحكى عن سلطان لبلاد وكان له ابن اطخم ( وسيم ) وكان السلطان يسكن في قصر كبير قريب لطريق الملك فهد بالرياض وكان الأبن يحب بنت الصياد الفقير اللتي تسكن في كوخ قديم بجوار النهر قريب للدخل المحدود المهم كان هذا الفتى كل يوم يذهب الى النهر ويقز قصدي ينظر الى الفتاة وهي تطل (يؤيؤيؤ) قصدي تنظر من شباك الكوخ وهو يتميلح لها من بعيد انا لله قصدي يبتسم لها من بعيدوهي مسويه يعني تراني مانتبهت ولا خاقه وظل الحال هكذا الى ان جاء يوم قرر ابن السلطان انه يخربها (ياليل اللغه العربيه) اقصد << ياكثر مايقول اقصد المهم قرر ان يتجرأ ويخبرها بحبه لها فأصطاد << متعوب عليها كلمة اصطاد صاد سمكه كبيره وشق بطنها ووضع في داخلها ( جوال نوكيا كمرتين بلوتوث وشريحة زين لأنهم مايمدحون ابراج الأتصالات عندهم ووضع رقمه وشحن بقيمة 100دينار اوووما دينار ؟ خخخخخخخخخخ ) وربط على بطن السمكه وطالع وين شباكهم فيه ورمى السمكه بقوووه فصكت في جبهة البنت واصفرت (واغمى عليها ) وفورا ابوها الصياد الفقير نقز من محله يوووووه اقصد طمر لاموطمر وشي ياربي وشي ايه نهض من مكانه وحمل ابنته والى اسعاف الشميسي ضعوف مايمديهم التخصصي وعند وصول الصياد الى المستشفى وهو يركب حمار موديل 7 لون خمري ويحمل لوحه رقم (د ل خ 666 خصوصي الحوطه ) وحامل ابنته معه رفضو المستشفى دخوله ولابد من واسطه من ( شهبندر التجار ) الراجحي حقهم وفعلا جاب الواسطه ودخلوها الأسعاف وبعد الفحص الدوري للسيارات آسف الفحص الطبي تبين ان الفتاة فقدت الذاكره وصارت تقول (بق بق بق بقيق) مثل صوت الدجاجه ماعلينا المهم وبعد بورهه<<حلوه بوورهه خشت مزاجي وبعد برهه من الزمن جاء ابن السلطان وطرق باب الكوخ ( طق طق طاق طاقيه رن رن ياجرس ) وفتحت الفتاة الباب فقال الفتى (وش دين امك انتي) يؤيؤعفوا قال اين انتي كل هذه المده ؟ قالت الفتاة له بأستغراب ( بق بق بقيق ؟ ) فطارت عيون الفتى وشو طارت بعد انت طارت ولا طبول اندهش الفتى منها ثم قال ( على مين تلعبهاعلى مين يابنت الناس ) اخذتي الجوال والشريحه والشحن ودقيتيني ركبه تخيل يقول ركبه المهم مانبي ندخل بالسياسه ( وش دخل السياسه طيب بالموضوع محشش الأخ ) المهم نكمل قال لها اخذتي كل شي ونسيتيني فقالت ( بقيق بق بق بقيق؟ ) عندها الفتى جته ام العبيد قصدي غضب منها فسطرها كف يعني بالفرنسي صفعها على خدها فسقطت الفتاة مغشيا عليها وحط رجله يعني فرك انا لله وشي ياجماعه ايه صح هرب وفي طريقه احس الفتى بتأنيب الضمير ياربيه بس من وين جبت هالكلمه بالله مره ثانيه (بتأنيب الضمير) وناااسه فقرر ان يرجع الى الفتاة وفي طريق عودته فكر قليلا وقال لو رجعت لاصارت مشكله مع ابي السلطان وفي النهايه قرر ان يهرب<< (حددبترجع ولا بتنحاااش محنا فاضيلك ورانا اشغال ) المهم وفي اثناء ذلك افاقت ( يؤ يؤ ) منيب بسيط من وين جبت افاقت يلعن ابو الديره ياشيخ احم ماعلينا !! هاااه متبعين معي ولا مفهين ؟ 
طيب حلووو ...

بعد ما افاقت الفتاة وجدت السمكه بجانبها حينها علمت ان كل ماحدث كان حلم منذ فقدت وعيها الى ان هرب الفتى ابن السلطان فقالت ان هذا الحلم درس لي لكي انتبه من المبزره والمراهقين يعني من الشباب الذين يتلاعبون في بنات خلق الله يوووووه كل شوي اعدل فاضي انا وان الشاب من اول مصيبه او مشكله سوف يتخلى عن البنت بكل سهوله منيب بسيط طلعت مطوع وانصح ماعلينا لا تدخلونا في الرياضه 


خلاااص تعبت اكتب وش مقعدكم 

يله كل واحد يدفلج بيتهم ...