سلااااام

تدرون ليش الببسي بريال ونص ماخلوه بريالين لان اغلب الناس ماتبي النص الباقي وش تسويبه لو ريالين باخذ ببسي واحد وبضف خشتي لكن بريال ونص اقول اخذ ثنين بثلاثه ريال شفتو كيف المخ والناس اللي تفكر وحنا ياغافلين لكم الله زي اسعار الاسواق الكبيره بنده والعثيم لاحظو كل شي عندهم سعره لابد وربع ونص و56 هلله وهلم جر ناس تعرف تفكر وتعرف كيف تبيع
 << قل قسم يالحوطي  !!
شركة الاتصالات قبل فتره معطين عملائهم شهر مكالمات مجانا اللي قاهرني يوم صارت المكالمات بلاش ماعاد صرت اكلم سبحان الله مالقيت من اكلمه صرت ادق على امي وانا في غرفتي فوق وهي في الصاله تحت (هاه غداكم زاهب من عندكم من دق جرس الباب قبل شوي) بس ادور حتسي !!
فتحت صفحة قوقل واكتب ( رشيد الحوطي ) لقافه والقى ناس ماخذين نكي ومواضيعي وحاطينها في منتديات ثانيه خوش والله سرق عينك عينك هذي مشكلة الضعوف ماعندهم حقوق طبع << الله واكبر يا نجيب محفوظ !!
والله قرب الشتاء والناس بيلبسون ملابس شتويه عن البرد بس كلها كوم والشراريب تكرمون كوم وخصوصا لا صليت في مسجد صاكين اؤم الدرايش مافيه منسم الا الباب اللي ندخل منه عاد شم الروائح واذا صار مسجد صغير الله حدث فلا حرج بس اسجد وقدامك واحد لابس شراب له مده مافصخه ياشيخ مافيه امل تخشع مايمديه الامام يسلم الا انت منحاش من المسجد تبي الفكه !!
ناداني الوليد بن طلال وقالي تعال بزوجك بنتي قلت له اسمحلي ابي مدرسه هالشباب طايحين يتشرطون لابغى يعرس الا مدرسه ولا موظفه وش تبي ياخي تبي راتب البنت مو من حقك انت ملزوم تصرف عليها يا درج !!
بعض البنات تبي العرس وسبحان الله مالله وفقها برجال يفتح النفس , وبنات ماتبي العرس تتشرط ولا خايفه من الزواج ايه مبسوطه عند ابوها مدلعها الله يخلف على ابو اللي جابنا بس ماعرفنا دلع ولا غيره ويجيهم رجاجيل كفو وعليهم القيمه ويتنعفقون مانبي نعرس قهر والله ( يأدي الحلق اللي بلا ودان )

الله يرحم زمان اول مافيه الا تلفون ثابت واللي يغازلون مالهم الا هالثابت اووما الحين تطورت منفوحه جوالات ونت تكنولوجيا وصار الغزل من الهوايات زي جمع الطوابع والمراسله اللي نقراها في المجلات من اول وماندري وشو الطوابع والمراسله ,, ولو سالنا احد ذيك الأيام وش هوايتك كان قلت له السربته في الشوارع في عز القايله ولا المصاقيل !!
نرجع لمحور حديثنا هواية الغزل صارت الدعوه هوايه وصارو الشباب والبنات يتسابقون من يعلق الثاني ويخليه يحبه عشان بعدها يحوس ابو اؤؤم اللي جابو اهله واللي يطيح الله يخلف عليه وخصوصا لاصار اول مره يحب ياعزتيله يصير مسبه وحالته حاله
لا اخفيكم سرا << حلوه الكلمه عجبتني ,, ماعلينا لا تدخلونا في السياسه اول مره حبيت في حياتي طبعا قروي وماقد شفت خير ولا بنات اشوف امي وخواتي واللي في التلفزيون بس ولا قد تكلمت مع بنات الا ام الجيران لاجت لامي في الضحى تتقهوى عندها لا دخلت وقلت (ياولد احم فيه احد ) قالت لي ( هلا وليدي وشلونك ابوي ) عاد انا استحي مارد اسفهها واروح هي تحسبني ثقل مادرت ان مستحي وماعرف ارد على حريم ومفهي المهم حبيت وحده ملكعه وخطيره جداجدا وطاحت بواحد دلخ وبكرتونه كان عليها صوت لاكلمتها تلقاني قاعد متروبع واذا ردت وقالت الو بس تلقاني بدون شعور فاق ثمي ومنبطح على بطني رايح وطي وافهي مع صوتها كنت اقول بنفسي لويسمع صوتها اصقه طاب وعرفت كيف تعلقني وبعدها بدت تلعب فيني صرت كني (كوره بين رجول الثنيان لا سحب في الحمراني من اول في مباريات النصروالهلال ) الزبده بعدها حرمت احب لأن اللي اولها خراب تاليها خراب !!
انتم معي ولا متنحين ؟؟ ايه اشوا (عاد ادولت دقدا دقدا ودقني دقني دق) << الله يخلف على اهلك بس !!

وشسمه ذا << ياكثر اللي يقولون هالكلمه ابي احتسي عن وشسمه ذا خخخخخخخخخخ << تستخف دمك انت ( طيب طيب لاتدف )

خلاص خلصت وش تحترون يله كل واحد يدفلج لبيتهم

معاني المفردات :
 زاهب / جاهز .
 يتنعفقون / يتشرطون .
 ملكعه / لديها خبره امور كثيره .
 بدفلج / بنقلع = اريد ان اذهب < اشوا مهوب مدرس لغه عربيه

ليست هناك تعليقات:

إرسال تعليق

الاشتراك في: تعليقات الرسالة (Atom)